(image)
M0759 (not in Perry)
Tuesday, May 31, 2011
Image: Ensis et Vomer
759. Ensis et Vomer. "Procul hinc recede," dixit ensis vomeri, "ne consortione sordida me inquines." At ille contra ait, "Cur me sic despicis, superbe? Ferrum tibi pater est; est et mihi. Deinde an te latet quantum mihi debeas? Nam si, otiosus, solum non proscinderem ut fruges nascantur, quae tuam herilem manum reficiant, nonne illa mox languesceret? Quid tunc de te fieret? Forte turpem situm duceres, in angulo tenebricoso iacens." Agricola eodem prorsus luto ac miles confictus est, sed ille alteri praestat quod operam magis utilem nobis praebeat.
Monday, May 30, 2011
Image: Iuncus et Canis
733. Iuncus et Canis. Contigit quod canis voluit facere rusticitatem suam super congregationem scirporum, et unus iuncus bene stimulavit posteriora ipsius. Et canis recessit longius et super iuncos latravit. Dixit iuncus, “Melius volo quod latres me a longe quam coninquines me de prope.”
(image)
M0733 Perry608
Sunday, May 29, 2011
Image: Nanus et Villanus
811. Nanus et Villanus. Quidam villanus cepit forte Nanum monticulum. Qui, ut dimitteretur, trium optionum potestatem homini dedit. Mulier, ut optaret, virum suum rogavit, affirmans se melius scire quid foret optandum. Vir ergo mulieri duas optiones concessit. Illa autem, oportunum tempus exspectans, optare tardavit. Contigit itaque una die ipsam dorsi arietini spinam rodere. Cuius medullam, satis desideratam, cum attingere non posset, os viro porrexit et ait, “Utinam haberes modo ferreum rostrum ad medullam hanc leviter extrahendam!” Statim post verba sedit maritus ferro rostratus. Tunc ait uxor, “Utinam esset modo facies tua sine rostro!” Statim post verba sedit maritus sine rostro, sed etiam sine naso. Tunc ait uxori, “Utinam esset modo facies mea velut ante fuit!” Taliter optatis eorum nihil utilitatis affuit.
(image)
M0811 Perry668
Saturday, May 28, 2011
Image: Mercurius et Canis
789. Mercurius et Canis. Stabat in via Mercurius quadrangularis, imus cui subiacebat lapidum acervus. Accedens canis “Primum, salve,” inquit, “Mercuri; tum inungere te volo, nec sic Deum praeterire eumque palaestritam.” Cui Deus, “Si mihi hocce, quod adpositum est, non linges oleum, nec imminxeris mihi, gratiam habebo tibi. Neque me amplius honorare velis.”
(image: ancient herm)
M0789 Perry308
Friday, May 27, 2011
Image: Iuppiter et Dolium
775. Iuppiter et Dolium. Iuppiter, in dolio cum cuncta collegisset bona, id operuit et collocavit apud hominem. Homo autem ille, impotens sui et scire gestiens quid ibi lateret, operculo amoto, bona permisit abire Deorum ad domos, illucque volare, ac procul a terris sursum fugere. Sola autem remansit Spes, quam impositum repressit operculum. Idcirco Spes mortalibus adest sola ac fugitivorum unumquodque bonorum pollicetur se tradituram esse nobis.
(image)
M0775 Perry312
Thursday, May 26, 2011
Image: Sceleratus et Daemon
916. Sceleratus et Daemon. Vir malignus, cum plurima perpetrasset scelera, saepius captus, et carcere conclusus arctissima et pervigili custodia teneretur, Daemonis auxilium implorabat, qui saepenumero illi adfuit et e multis eum periculis liberavit. Tandem iterum deprehenso et solitum auxilium imploranti, Daemon, magnum calceorum pertusorum fascem super humeros habens, apparuit dicens, “Amice, amplius tibi auxilio esse non possum. Tot enim loca pro te liberando hactenus peragravi ut hos omnes calceos contriverim. Nulla mihi superest pecunia qua alios valeam comparare. Quare pereundum est tibi.” Haec admonet fabula ne existimemus nostra semper impunita fore peccata.
(image)
M0916 (not in Perry)
Wednesday, May 25, 2011
Image: Doctissimi Tres et Tigris
893. Doctissimi Tres et Tigris. Dum tres homines apud Indos doctissimi in silvis forte ambulant, accidit ut tigris ossa huc illuc dissipata invenirent. Tum unus ex iis, ut vim doctrinae sociis ostentaret, “En ego,” inquit, “arte mea potentissima haec ossa in unum corpus restituere possum.” Alii quidem dubitabant, sed cum doctus ille arcana quaedam verba edidisset, extemplo ossa in pristinam figuram ultro redierunt. Secundus vero, qui vult sapientior videri, “Ego carnem et pelle redintegrare queo,” affirmavit. Qui cum voces quasdam clam cantavisset, tigris inanimus quidem sed cum carne et pelle, sicut in vita fuerat, exstitit. Inde tertius, ne a sociis sapientia superari videretur, “En ego maiora faciam,” clamavit, et statim ut tigris revivisceret, effecit. Quid multa? Tigris eos omnes dilaniavit.
(image)
M0893 (not in Perry)
Tuesday, May 24, 2011
Image: Viatores et Pons
925. Viatores et Pons. Boeotius viator olim una cum Corinthio et Atheniensi noctu ambulabat. Mox comites ad rapidum flumen veniunt. Forte altus pons iungebat flumen. Viatores ascendunt pontem et in aqua sub pedibus imaginem lunae vident. “Ecce,” inquit Boeotius, “pulcher caseus in aqua iacet. Cur nos non praemium deportamus?” Sine mora Boeotius manibus pontem tenet, et suspendit corpus super aquam. Deinde Corinthius prehendit crura amici. Atheniensis habet tertium locum et pedibus praemium captat. Tum exclamat Boeotius, “Vos tenete firmiter mea crura, nam manus durum lignum terit.” Simul laxat manus, et omnes in aquam decidunt.
(image)
M0925 (not in Perry)
Monday, May 23, 2011
Image: Simonides et Gemini
869. Simonides et Gemini. Simonides certo pretio conductus est ut cuidam pyctae victori laudem scriberet. Cum materia exigua impetum frenaret, poetae licentia usus est atque sidera gemina interposuit, Deos pyctas gloriosos. Victor opus adprobavit, sed Simonides tertiam mercedis partem accepit. Cum reliquas posceret, “Di illi,” inquit, “reddent, quorum sunt duae laudis partes.” Fraudatus quamvis et iniuria dolens, ad convivium invitatus, hora dicta rediit et recubuit. Convivium poculis splendebat, domus laeta resonabat, cum repente iuvenes duo, pulvere sparsi, sudore multo diffluentes, corpore supra formam humanam, cuidam servolo mandant ut ad se Simonidem provocet, sine mora. Homo perturbatus Simonidem excitat. Unum vix pedem triclinio promorat, subito camarae ruina ceteros oppressit, nec ulli iuvenes reperti sunt ad ianuam; numinum praesentia vati vitam dedit, mercedis loco.
(image)
M0869 Perry522
Sunday, May 22, 2011
Image: Corvi et Vir Timidus
440. Corvi et Vir Timidus. Timidus quidam homo olim ad bellum proficiscebatur. Cui cum corvi crocitantes occurrissent, positis armis domi se continuit. Postera die idem repetens iter, eodem auspicio territus restitit. Quapropter ille, indignatus, “Vos quidem, quantum vultis,” inquit, “crocitate, sed meas carnes ne voretis.”
(image)
M0440 Perry245
Saturday, May 21, 2011
Image: Gallina Plumis Spoliata
568. Gallina Plumis Spoliata. Vulpes famelica gallinam rapuerat et plus media plumarum parte iam spoliaverat. Canis facinus advertit, accurrit, irruit, et praedam e dentibus avidis extorquet. Gallina, male mulcata, cum ad suam gentem rediret, “O sorores,” inquit, “quam parum abfuit quin dira nece vobis eriperer! Hinc forte in agros paululum diverteram; vulpes scelerata me necopinantem rapit, et ni canis validus succurreret, me miseram vorasset.” Et infortunium suum recens renarrat, misericordiam dulcem excitare cupiens. Sed illae contra clamitant, sic glocientes, “Fuge hinc, inepta, cum tuis querimoniis, et apud aves deplumes locum tibi quaere. Si misera es, ipsa tibi malum advocasti moribus indoctis tuis.” Cumque ea parumper renueret, ferociunt; rostris saevis abigunt et foras extrudunt. Ubi est calamitas, ibi culpa esse creditur.
(image)
M0568 (not in Perry)
Friday, May 20, 2011
Image: Spica Glorians
737. Spica Glorians. Cum agricola falcem messibus iam pararet, spica caput erectum ad auras tollebat. Hinc gloriatur, et sorores ceteras, humum spectantes curvo capite, despicit. Quarum una ait, “Si tibi, ut nobis, granis refertum esset, hoc caput non ita tolleres.” Superbia in capite vacuo laxe habitat.
(image)
M0737 (not in Perry)
Thursday, May 19, 2011
Image: Astrologi et Asinus
892. Astrologi et Asinus. Rex quidam fidem maximam habebat ei generi hominum qui astrologi vocantur, quod motu stellarum imbres ventosque praedicere solent. Rex, qui multum in venationibus erat, aliquando dum magnum cervum canibus per silvas agitat, celeri equo longe ante omnes socios praetervectus est. Interea caelum nubibus obscuratur gravisque imber cum multa grandine in terram decidit. Rex igitur, quod parvam casam inter arbores videt, tempestatis perfugium petit. Tum ubi is graviter incusabat indoctos illos astrologos, “Nulla tamen tempestas,” respondit agricola cuius casa erat, “me incautum excipit; semper enim meus asinus, qui fruges horti ad forum portare solet, voce rauca imbrem mihi praedicit.” “Nimirum,” cum risu respondit rex, “si tuus asinus tam bonus astrologus est, meos astrologos posthac in numero asinorum habebo.”
(image)
M0892 (not in Perry)
Wednesday, May 18, 2011
Image: Olitor et Plantae Silvestres
837. Olitor et Plantae Silvestres. Olitorem quidam, cum videret irrigare olera, rogavit quomodo accideret ut gramina silvestria nec plantata nec culta maturescerent; quae vero homines sevissent, saepius arescerent. “Silvestres,” respondet olitor, “plantae sola Dei providentia curantur; mansuetae autem hominum manibus coluntur.”
(image)
M0837 Perry119
Tuesday, May 17, 2011
Image: Cyclops et Homo
808. Cyclops et Homo. Vir probus et honestus diu cum liberis suis bene et fortunate vixerat. Post deinde inopia et egestate affectus et afflictus, improbis numen petebat conviciis, seque volebat interimere. Correpta ergo sica, in locum desertum exiit, mori magis cupiens quam misere vivere. Inter eundum offendit fossam altissimam, in qua ab homine giganteo (Cyclops ei erat nomen) multum auri esset reconditum. Id ut vidit pius ille homo, medius metum inter et gaudium, proiecta sica, tollit aurum laetusque domum ad liberos suos properat. Cyclops deinde ad scrobem reversus, pro auro reperit gladium, eoque stricto, se interficit. Malis mala accidunt; bonis bona manent.
(image)
M0808 Perry405
Monday, May 16, 2011
Image: Ranae et Ovis
609. Ranae et Ovis. Ovis incauta, cum gramen in paludis margine carperet, vestigium terra lubrica fallente, subito in undam decidit et limo praepedita haesit. Mox tamen sese expedire quaerit et conamine, quanto potest, inter ulvas putres se movet coenumque pedibus excitatum dissipat. Ranae indignantes, “Quid sic,” inquiunt, “regna nostra et virides domos turbare pergis? Quid cogitas, inepta et indocilis pecus? Quin conquiescis? Te negas videlicet habitare posse in hoc lacu, at certe nimis delicata es. Nos natae sumus in ipso, et vivimus contentae.” Bidens respondet, “Regna haec sordida, fateor, volo relinquere. Ignoscite tamen; nata in ipsis non fui.” Fabula hos notat qui graviter ferunt ea aliis displicere quae sibi in primis placent.
(image)
M0609 (not in Perry)
Sunday, May 15, 2011
Image: Condemnatus Arbor Eligens
917. Condemnatus Arbor Eligens. Quidam stultus, condemnatus ad suspendendum, impetravit quod arborem eligeret ubi suspenderetur. Ductus per nemora nusquam invenit arborem in qua suspendi placeret, et sic liberatus est.
(image)
M0917 Perry633
Saturday, May 14, 2011
Image: Rusticus in Stercoribus Nutritus
828. Rusticus in Stercoribus Nutritus. Rusticus, qui nutritus erat in fumo et in stercoribus animalium, et cum transisset prope apothecariam ubi species aromaticae terebantur, non valens ferre odorem corruit, quasi semivivus nec potuit convalescere aut confortari donec, portatus ad domum suam, ad fetorem fumi et stercorum reverteretur.
(image)
M0828 Perry630
Friday, May 13, 2011
Image: Canis, Herus, et Cibus
376. Canis, Herus, et Cibus. Canis acer, fidelis, et strenuus domum herilem bene ab omni fure tutam praestabat. Quapropter herus ipsi maximas laudes ultro tribuebat et palpationes et blanditias saepius affatim impertiebat occurrenti, at cibos dabat manu parcissima. Ergo custos miser clamitat et hero obiicit se non ali blanditiis, neque corpus macrum recreari laudibus; se his carere posse, solidius modo aliquid tribueret quo famem repelleret; nil se obstiturum quin cetera omitteret. At ille, iocans, questus iustos elusit, famelico blandiens multo magis quam prius; benevolentiam inanem effudit, sed victum dedit nihilo liberalius. O dives, pauperi largire quibus indiget! Benignus non es, si das quae hunc nihil iuvant.
(source)
M0376 (not in Perry). Source: Desbillons 12.17 (adapted into prose). This fable is not in Perry’s catalog; it appears original to Desbillons, as he cites no source. Compare the fable of the neglected parrot, #551, or the neglected goldfinch, #552.
Thursday, May 12, 2011
Image: Draco Beneficii Memor
626. Draco Beneficii Memor. Puer draconem parvulum emebat magnaque eum cura educabat. Cumque crevisset, loquebatur, quasi cum intellegente, ludens ac dormiens cum ipso. Cum vero ad ingentem magnitudinem draco pervenisset, in solitudinem a civibus est dimissus. Post cum puer, adolescens factus, reversus a spectaculo quodam cum aliquibus aequalibus, in latrones incidisset et clamorem extulisset, ecce draco praesto est, et alios interimit, ipsum vero salvum conservat.
(image)
M0626 (not in Perry)
Tuesday, May 10, 2011
Image: Sacerdos et Pira
896. Sacerdos et Pira. Sacerdos quidam gulosus, extra patriam ad nuptias profisciscens ad quas fuerat invitatus, reperit in itinere pirorum acervum, quorum ne unum quidem attigit quamvis magna affectus fame; quin potius ea, ludibrio habens, lotio conspersit, indignabatur enim huiusmodi cibos sibi in itinere offerri qui ad lautas accedebat epulas. Sed, cum in itinere torrentem quendam ita imbribus auctum offendisset ut sine vitae periculo eum transire non posset, domum redire constituit. Revertens autem ieiunus, tanta est oppressus fame ut, nisi pira illa quae urina consperserat comesset cum aliud non inveniret, extingueretur. Haec fabula monet nihil esse contemnendum, cum nihil sit tam vile et abiectum, quod aliquando usui esse non possit.
(image)
M0896 (not in Perry)
Monday, May 9, 2011
Image: Gallus et Feles Lecticarii
556. Gallus et Feles Lecticarii. Gallus lecticarios feles habebat. Vulpes, ut vidit hunc gloriose vehi, sic est locuta, “Moneo dolum praecaveas, namque si vultus istorum consideres, iudices praedam portare, non sarcinam.” Postquam esurire coepit societas felum, dominum discerpsit et funeris partes fecit.
(image)
M0556 Perry546
Sunday, May 8, 2011
Image: Canis, Bos, Equus, et Homo
380. Canis, Bos, Equus, et Homo. Equus, bos et canis, frigore pressi, in hominis cuiusdam aedes convenere, qui, eos excipiens, accenso foco fovit ac deinde equo hordeum, bovi paleas obtulit; cani vero ex iis quae in mensa aderant dedit. Quam ob hospitalitatem ipsi gratias reddidere, singuli vitae suae tempus partiti eique gratificati. Equus itaque primos annos largitus est; ideo praecipiti mente et superba unusquisque hominum prima aetate est. Medios vero post hunc annos taurus dedit; ideo tunc laboriosus et sedulus est quisque studetque divitias cumulare. Ultimos tandem annos canis praebuit, et propterea senex quilibet morosus est, sibi victum dantem tantummodo amat, blanditur, assentiturque, non dantibus vero allatrat et insultat.
(image)
M0380 = Perry105. Source: De Furia 278. This is Perry 105. Compare the fable about the man who eats the farm animals in winter, #379.
Saturday, May 7, 2011
Image: Perdices Duae et Auceps
529. Perdices Duae et Auceps. Perdices duae in agro eodem pullos simul educabant, una quidem complures, at altera duos tantum. Parens ditior istam pauperem prae se contemnere coepit et “Quantis damnis,” dixit, “me affici prius necesse esset quam mea fortuna tuae similis fieret!” Parens paupercula, cum talem superbiam ferre non posset, loco diversa paulum abscessit. Auceps interea, dolis omnibus suis instructus, tacito gradu illuc accedit. Hanc pascentem cum prole gemina videt respuitque. At alteram, pullorum grege tanto stipante cinctam, pariter ut adspicit, eo unice industriam confert et pedicarum dolos caecos, et matrem et omnem familiam simul capit.
(image)
M0529 (not in Perry)
Friday, May 6, 2011
Image: Rusticus et Torrens
822. Rusticus et Torrens. Rusticus, torrentem transiturus qui forte imbribus excreverat, quaerebat vadum. Et, cum primum eam fluminis partem tentasset quae quietior placidiorque videbatur, reperit eam altiorem quam animo erat opinatus. Rursus ibi breviorem tutioremque adinvenit, ubi maiore aquarum strepitu fluvius decurrebat. Tum secum “Quam tutius,” inquit, “clamosis aquis quam quietis et silentibus vitam nostram credere possumus.” Hac admonemur fabula ut minus verbosos et minaces quam quietos extimescamus.
(image)
M0822 Perry723
Thursday, May 5, 2011
Image: Viator et Lapides
920. Viator et Lapides. “Isti lapides hercle me conficiunt labore gravi,” inquit viator, “cursumque etiam morantur nec mediocriter! Cur talem molestiam fero, viam saxosam ingressus?” Simulque lapides, quotquot obstant, tollere et eiicere incipit et limitem expurgare, qua pedes facilius sese agere possint. Sed quis enim fructus hinc demum vero redit? Is quadruplum laborem trahit, et moram quadruplam. Homines saepe malum augent dum stulte volunt illud minuere quod sufferendum foret.
(image)
M0920 (not in Perry)
Wednesday, May 4, 2011
Image: Monachi et Abbates
895. Monachi et Abbates. Quidam abbas dedit monachis suis tria fercula. Dixerunt monachi, “Iste parum dat nobis. Rogemus Deum quod cito moriatur,” et sive ex hac causa, sive ex alia, cito mortuus est. Substitutus est alius qui tantum dedit duo fercula. Irati monachi dixerunt, “Nunc magis orandum est, quia unum ferculum subtractum est, Deus subtrahat ei vitam.” Tandem mortuus est. Substitutus est tertius, qui duo subtraxit. Monachi dixerunt, “Iste pessimus est inter omnes, quia fame nos interficit. Rogemus Deum quod cito moriatur.” Dixit unus monachus, “Rogo Deum quod det ei longam vitam.” Alii admirati quaerebant quare hoc diceret. Qui ait, “Video quod primus fuit malus, secundus peior, iste pessimus. Timeo, cum mortuus fuerit, alius peior succedet qui penitus fame nos perimet.”
(image)
M0895 (not in Perry)
Image: Abbas et Iuvenis
894. Abbas et Iuvenis. Quidam iuvenis voluit claustralem vitam ducere. Dixit abbas, “Laudes haec ossa et benedicas,” demonstrato acervo ossium mortuorum. Laudavit igitur et benedixit. Quo facto, quaesivit abbas, “Benedixisti ossibus?” Respondit, “Benedixi.” Quaerebat abbas, “Quid responderunt?” Dixit iuvenis, “Nihil.” Iterum abbas, “Maledicas et vituperes.” Qui sic fecit quantum potuit. Et ait abbas, “Maledixisti?” Et ait iuvenis, “Maledixi.” Et quaesivit abbas, “Quid responderunt?” Et ait iuvenis, “Nihil.” Ait abbas, “Frater, talem te oportet esse ut, si verus monachus vis fieri, ita benedictionibus et maledictionibus nihil respondeas.”
(image)
M0894 (not in Perry)
Tuesday, May 3, 2011
Image: Heremita et Mus
897. Heremita et Mus. Heremita quidam, volens servum suum perscrutari ut fidem eius cognosceret, murem sub vasculo occultavit et ait servo, “Ire habeo ad confratres visitandos; tu vero ad custodiam cellae remanebis et, si quid forte opus est ut sumas, nil tibi sit prohibitum. Solum autem vas illud ibi reversum ne tangas, ne removeas. Nolo enim te scire quid subtus habeat.” Itaque, abeunte domino, servus de re interdicta sibi quaenam esset mirabatur, et visum est ei quod satis posset rem scire, ita quod magister suus nesciret. Accedens igitur ad vasculum, dum vas removit, murem ibi absconditum incautus liberavit. Reversus ergo tandem heremita, statim de vasis secreto servum interrogavit utrum illud vidisset an non. Et ait servus, “Vidi quidem, sed melius non vidissem.”
(image)
M0897 Perry664
Monday, May 2, 2011
Image: Fur et Stultus
905. Fur et Stultus. Stultus quidam delubrum intravit. Calceos in vestibulo reliquit et in limine haec verba scripsit, “Ego, cuius hi calcei sunt, admodum validus sum, et mox redibo.” Fur calceos abripuit, et ita subscripsit, “Ego sum cursor velocissimus, nec mihi in animo est redire.”
(image)
M0905 (not in Perry)
Sunday, May 1, 2011
Image: Serapis et Parricida
801. Serapis et Parricida. Decubuerat ad ruinosum parietem quidam facinoribus parricidii pollutus, ut ibi somnum caperet. Huic oblatus per quietem Serapis, monuit eum ut fugeret atque discederet et alibi obdormisceret. Paruit ille et surrexit atque abiit, cum statim paries ille corruit. Mane gratias agens hic diis ob conservatam ab ipsis vitam suam cum gaudio rem divinam fecit, quasi parricidae numini divino cari essent. Rursum autem Serapis dormienti suam speciem ostendit et “Censesne tu,” inquit, “sceleste, mihi curae esse improbos atque malos? Immo si tu nunc isto pacto obiisses mortem, fuisset ea singularis doloris et infamiae expers. Quam ideo nunc effugisti, quia servaris crucis merito supplicio.”
(image)
M0801 (not in Perry)
Subscribe to:
Posts (Atom)